Fleiri stovnar byggjast

Nýtt barnaheim, tvey nýggj sambýli til fólk við menningartarni og nýggjur bú- og viðgerastovnur til børn og ung við autismu. Tað eru nýggir stovnar sum skulu byggjast, og lógaruppskotini eru send til hoyringar í dag, upplýsir Almannamálaráðið. Eyðgunn Samuelsen, landsstýriskvinna vísir á, at fleiri av verandi sambýlum og bústovnum eru ikki í nøktandi standi og eru heldur ikki hóskandi til endamálið. Eyðgunn Samuelsen sigur, at nýggja Barnaheimið verður eitt gott og trygt stað hjá børnum, ungum og familjum, har tey fáa møguleika at uppliva mennandi umsorgan í einum tryggum og eggjandi umhvørvi. Sum nakað nýtt fer Barnaheimið at bjóða ungum eftirvernd, soleiðis at hesi ungu ikki verða slept upp á fjall eftir lokna barnavernd. Eisini fer nýggja Barnaheimið at hava fleiri pláss til familjuviðgerðir, sum er ein liður at styrkja foreldraførleikan við ráðgeving og vegleiðing. - Við nýggju kørmunum á 200 mió. kr. til bygging av vardum bústøðum, kunnu vit tryggja, at vit fáa hóskandi karmar um tað innihald, sum vit í dag hava torført við at veita tí umstøðurnar eru vánaligar, sigur landsstýriskvinnan.