Kunnu víkja frá kravinum um landsroyndir

Landsstýrisfólkið í mentamálum skal nú fáa heimild til í serligum førum at gera frávik frá regluni um at skipa fyri landsroynd.

Rigmor Dam, landsstýriskvinna, skjýtur upp at broyta fólkaskúlalógina, og nýggja reglan skal koma í gildi 1. januar.

Sambært fólkaskúlalógini skal landsstýrisfólkið á hvørjum ári skipa fyri landsroynd í føroyskum, støddfrøði og náttúru og tøkni í 4. og 6. flokki í fólkaskúlanum.

Avbjóðingar

Landsstýriskvinnan í mentamálum sigur, at ávísar avbjóðingar hava verið við skipanini, og tí verður mælt til, at í ávísum førum kann víkjast frá kravinum um at skipa fyri landsroyndum.

Eftir fleiri óhepnar hendingar er tørvur á at eftirmeta og kanska endurskoða skipanina bæði tøkniliga og námsfrøðiliga.

Uppskotið hevur eisini týdning fyri fíggjarlógina, tí verður landsroynd ikki hildin í einum ári, sparir landskassin umleið 800.000 kr., stendur í viðmerkingunum til uppskotið.