Fiskaaling fær ikki nýggjan partapening men lán

P/f Fiskaaling fær ikki nýggjan partapening, men lán úr landskassanum til at koma fyri seg.

Vinnunevndin skjýtur upp at broyta lógina hjá Poul Michelsen, landsstýrismanni, um 9,5 milliónir í partapeningi til lóg um lán.

Ábyrgdarlánið, sum er 9,5 mió. kr., skal vera rentufrítt.

Tað skal krevjast aftur í einum, ella í avdráttum, tá eginpeningur felagsins er í minsta lagi 500.000 kr.  

Fíggjarnevndin samd

Fíggjarnevndin tekur undir við uppskotinum hjá Vinnunevndini. 

Eitt ábyrgdarlán er fremmandafígging og fer ikki inn í eginpeningin hjá felagnum.

Lánið stendur í veðrætti aftan fyri øll onnur lán hjá Fiskaaling. 

Lánið styrkir kredittvirði felagsins og kann loysa aktuellu fíggjarligu avbjóðingarnar hjá felagnum, sigur Vinnunevndin. 

Andstøðan átalar

Hevði landsstýrið ikki lagt seg út í ætlanina hjá Fiskaaling at selja lívfiskastøðina í Skopun, hevði almenna partafelagið ikki havt brúk fyri pengum úr landskassanum nú.

Tað sigur meirilutin í Vinnunevndini, sum er andstøðan, um uppskotið hjá Poul Michelsen um at seta nýggjan partapening, 9,5 mió. kr., í Fiskaaling.

Fiskaaling slapp ikki at selja lívfiskastøðina, hóast keyparar vóru.

Slapp felagið at selja, var tað solvent nú, siga andstøðumenninir í Vinnunevndini. 

Drál

Teir siga, at landsstýrismaðurin í vinnumálum hevur drálað og toygt spurningin um lívfisk í Føroyum. 

Privatur hevur boðið sær til at taka á seg hesa uppgávuna, men landsstýrið hevur ikki viljað samráðst um tað. 

Landsstýrið hevur tí skapt trupulleikan, vit hava í dag, og tað átalar andstøðan harðliga. 

Landsstýrið ætlar tó at selja lívfiskastøðina í Skopun, tá nýggj er bygd.

Tá fær Fiskaaling pengar. Fiskaaling hevur tí ikki brúk fyri størri partapeningi til yvirkurs nú, men einum láni, sigur andstøðan.