Eingin býráðsfundur á Tvøroyri í dag kortini

Einki verður skrivað um orsøkina, at býráðsfundurin er útsettur.

Og tað verður heldur ikki upplýst, nær býráðsfundurin verður.

Skuldu velja nevndir av nýggjum

Nevndirnar í Tvøroyrar býráð skuldu veljast av nýggjum í dag.

Nýggi meirilutin á Tvøroyri, sum eru Bjarni Hammer, Bogi Johannesen og Súsanna Bertholdsen úr Javnaðarflokkinum, og so Kristina Roest, sum var vald á Borgaralistanum, vildu annars, at nevndarnir vóru skipaðar av nýggjum í dag.

Nýggi meirilutin krevur formansskapin og meirilutan í øllum nevndum, har tað ber til.

Borgarstjórin er altíð formaður í fíggjarnevndini, so borgarstjórin Kristin Michelsen verður framvegis formaður í fíggjarnevndini á Tvøroyri, sjálvt um hann hevur mist meirilutan.

Men tað verður so ikki í dag, at nevndirnar verða valdar av nýggjum, tí býráðsfundurin er útsettur.