Landsstýrið ætlar at yvirtaka kort og landmáting

Landsstýrið arbeiðir við yvirtøkuni.

Tí vil meirilutin í Uttanlandsnevndini hjá løgtinginum heldur bíða eftir landsstýrinum enn at samtykkja uppskotið hjá Fólkaflokkinum um at yvirtaka málsøkið, sum eitur kort- og landmátingarmyndugleiki.

Uttanlandsnevndin hevur biðið Sirið Stenberg, landsstýriskvinnu, og fólk í Umhvørvisstovuni at koma á fundin hjá nevndini um eina viku.

Sum skilst er landsstýrið komið langt við uppskotinum um yvirtøkuna.

Uppskotið hjá Fólkaflokkinum var eisini í tinginum í síðstu tingsetu.

Fall í vár

Men tað varð felt í vár. Bara Fólkaflokkurin og Miðflokkurin atkvøddu fyri.      

Meirilutin í Uttanlandsnevndini, allir flokkar í nevndini uttan Fólkaflokkurin, segði tá, at landsstýrið arbeiðir við einari yvirtøku, sum eisini umfatar sjókort.

Uppskotið hjá landsstýrinum er eisini neyvari, millum annað kostnaðarmetingin, enn uppskotið hjá Fólkaflokkinum, varð sagt tá.

Uppskotið hjá landsstýrinum um yvirtøkuna skuldi koma í løgtingið í hesari tingsetuni.   

Lógirnar um kortini og landmátingina í Føroyum eru danskar og frá 1928 og 1931.