Eisini ov fá vøggustovupláss í Klaksvík

Ikki bara í Tórshavnar kommunu, men eisini í Klaksvík eru ov fá dagsstovnapláss.

Í Klaksvik er serliga stórur tørvur á vøggustovuplássum.

24 børn, sum vórðu fødd í fjør, hava einki pláss. 24 børn svara til tvær vøggustovur. 

Umsitingin hjá býráðnum í Klaksvik mælir til at gera tvær bráðfeingis vøggustovur í kjallaranum í Spælistovuni á Brekku.

Bráðfeingis loysn

Ætlanin er, at dagrøktarleiðarin skal leiða hesar vøggustovurnar. Dagrøktarleiðarin er í sama húsi.

Talan er ikki um eitt varandi tilboð til børnini, men eitt stað, har tey trygt kunnu vera, til pláss er úti á verandi stovnum. 

Hetta er eitt stað, sum latið verður upp, tá allir dagsstovnar eru fullir, og sum verður latið aftur, tá ikki er brúk fyri tí, sigur umsitingin hjá Klaksvíkar kommunu.

Býráðið skal viðgera málið á býráðsfundinum í kvøld.