30 læknastørv ikki sett við fólki í føstum starvi

20 serlæknaøki í føroyska sjúkrahúsverkinum eru mannað heilt ella partvíst við konsulentum.

Og tíggju av 34 normeraðum kommunulæknastørvum eru sett við avloysarum.

Læknatrotið í Føroyum er aftur á skránni, nú Sirið Stenberg, landsstýriskvinna, hevur svarað Magnusi Rasmussen, løgtingsmanni, sum spurdi um serlæknar.

Niðurstøðan er, at 20 serlæknar og tíggju kommunulæknar í føstum starvi vanta.  

Eftir ætlan verður eitt avloysarastarv broytt til eitt fast kommunulæknastarv 1. apríl.

Leita og lýsa

Kommunulæknastørvini verða javnan lýst leys bæði í Føroyum, Danmark, Svøríki, Noregi og Íslandi, sigur Sirið Stenberg.

Og Heilsumálaráðið ger eisini nógv annað fyri at fáa fólk hendan vegin at virka sum kommunulækni.

Viðvíkjandi serlæknunum hevur sjúkrahúsverkið samband við føroyingar, sum útbúgva seg til serlækna. 

Avtalur eru gjørdar við Ríkissjúkrahúsið um ávísar sergreinar, har nýútbúnir føroyskir serlæknar arbeiða parttíð á Landssjúkrahúsinum í nøkur ár, til tey eru til reiðar at taka við starvi sum yvirlækni í føroyska sjúkrahúsverkinum. 

Ætlanin er eisini at seta fimm milliónir krónur av næsta ár til serlæknar, upplýsir Sirið Stenberg í svarinum til Magnus Rasmssen.