Løgreglan ávarar ímóti teldusníkum

Løgreglan í Føroyum hevur síðstu tíðina fingið fleiri fráboðanir frá fólki um, at sníkar hava verið inni á telduni hjá teimum og hava avmyndað tey í keðiligari støðu - sum løgreglan tekur til. 

Sníkarnir hótta síðani við at leggja myndirnar út á internetið ella senda tær til familju og vinir, um ikki viðkomandi flytir teimum pening, og tað skal vera talgilda gjaldoyrað, bitcoins. 

Løgreglan heitir á fólk, sum fáa slíkar teldupostar, um ikki at flyta pening, men í staðin at sletta teldupostin. Hesir teldupostar eru helst sendir til eina rúgvu av fólki, har sníkurin vónar, at onkur flytir pening. 

Hildur Hentze, dagligur leiðari á kriminaldeildini hjá løgregluni, segði við útvarpið, at løgreglan hevur varhugan av, at ongar myndir finnast, men at talan er um eina hóttan. Løgreglan ávarar tí fólki ímóti, at flyta peningin.

- Vit ávara fólki ímóti at flyta pening, tí vit hava varhugan av, at hetta bara er ein roynd at fáa pening frá fólki. Vit hava varhugan av, at sníkarar ikki hava verið inni á teldunum hjá fólki, og talan er tí ikki um veruligar myndir, sigur hon. 

Løgreglan hevur hoyrt frá fleiri, sum eru vís í, at tey ikki hava verið inni á nakrari ónærisligari heimasíðu á alnótini. Tí heldur løgreglan í Føroyum, at hetta bert er ógrundaðar hóttarnar.

Danska brúkararáðið hevur á heimasíðuni ráðgeving fyri, hvussu tú á bestan hátt verjir teg á alnótini. 

Les meira um talgilda sjálvverju her.