Leggja blómutyssi við vegir

Í dag og næstu dagarnir fara bilførarar ivaleyst at leggja merki til blómutyssi, sum eru sett upp við vegir ymsastaðni í landinum.

Hetta verður gjørt í sambandi við, at 1. juli er minningardagur teirra deyðu í ferðsluni.

Minningardagurin er hvørt ár tann fyrsta sunnudagin í juli.

Síðani seinasta minningardag eru tvey fólk deyð í ferðsluvanlukku.

Tann fyrsta ferðsluvanlukkan í Føroyum, sum kravdi mannalív, hendi í 1928, og síðani tá hava tilsamans 272 fólk latið lív í ferðsluvanlukku.