- Fundurin hevur styrkt NATO

Ynskið hjá Donaldi Trump, forseta, um at øll NATO-lond skulu náa málinum um at brúka 2 % av síni bruttutjóðarúrtøku til verjuendamál hevur havt ávirkan. Tað sigur Jens Stoltenberg, sum er aðalskrivari hjá NATO, nú NATO-fundurin í Brússel er av. 

Stoltenberg leggur afturat, at NATO-fundurin í Brússel seinastu dagarnar, hevur verið merktur av opnum og erligum orðaskifti, sum hevur styrkt NATO. 

Amerikanski forsetin byrjaði annars fundin við hvøssum atfinningum móti teimum NATO-londunum, sum enn ikki hava rokkið málinum.

USA brúkar 3,6 % av BTÚ til verjuendamál, meðan Danmark bara brúkar 1,2% og Norra 1,6%.

Donald Trump var tó væl nøgdur, tá fundurin var av og segði millum annað, at NATO er nógv sterkari nú enn fyri bara tveimum døgum síðani. 

Men bæði Lars Løkke Rasmussen og eisini Emmanuel Macron siga seg ikki hava lovað nakað, og finnast annars at ynskinum hjá Donaldi Trump um, at NATO-lond skulu brúka munandi meira til verjuendamál. 

Lars Løkke Rasmussen sigur við TV 2, at hann er glaður um, at amerikanski forsetin er nøgdur við fundin, men at hann ikki heilt skilur hví, tí Danmark fer so ikki at røkka málinum áðrenn 2024, sum Donald Trump annars hevur ynskt.