Íbúgvar í grønlendskari bygd rýma undan ísfjalli

Fleiri íbúgvar í Innaarsuit eru fluttir úr vandamiklu støðunum í bygdini, tí eitt ísfjall nærhendis hevur sett seg fast. Og íbúgvarnir vænta, at tað brotnar burtur av ísfjallinum, og at tað fer at elva til eina stóra flóðaldu.

Tað skrivar KNR. 

Íbúgvarnir eru fluttir til bygdarhúsið, skúlar og ansingarstovnar í bygdini. 

Kommunan og grønlendska løgreglan fylgja væl við, og bjargingarlið í bygdunum nærhendis eru klár, skuldi okkurt hent. Og harumframt hevur løgreglan lagt eina tilbúgvingarætlan til rættis skuldi okkurt hættisligt hent. 

Lina Davidsen, sum er vakthavandi hjá grønlendsku løgregluni, sigur, at er óvist, um íbúgvarnir sleppa heim - tað kann taka tímar, dagar ella vikur. 

Hetta er ikki fyrstu ferð, at grønlendska náttúran elvir til ótta. Í juni í fjør viðførdi eitt skriðulop til vatnflóð á vestaru síðu í Grønlandi. Fýra fólk lótu lív, 11 komu til skaða og fleiri hús fóru við stóru aldunum.

Í videobrotinum niðanfyri sæst, hvussu eitt petti av ísfjallinum brotnar burtur av og elvir til stórar aldur: