Sendiharrar til fótbólt í Gundadali

Ikki allir turkar vórðu útilokaðir frá áskoðaraplássunum til dystin millum B36 og turkiska felagið Besiktas á ovara vølli í Gundadali hóskvøldið, tí turkiski sendiharrin í Danmark sá dystin.

Kenan Ipek sá dystin saman við Poul Michelsen, landsstýrismanni, og danska sendiharranum í Turkalandi, Svend Olling, sum hevur hildið summarfrí í Føroyum.

Í gjár var fundur millum Kenan Ipek og Poul Michelsen. 

Fríhandilssáttmálin millum Turkaland og Føroyar hevur verið í gildi í eitt lítið ár.

Á fundinum í gjár umrøddu Poul Michelsen og Kenan Ipek, hvussu handilssambondini landanna millum kunnu økjast, bæði tá talan er um at útflyta føroyskar fiskavørur til Turkalands og innflutning úr Turkalandi.

Eisini varð tosað um samstarvsmøguleikar á øðrum økjum.