Kunngerðin um koyrikort verður broytt

Henrik Old, landsstýrismaður í samferðslumálum, broytir nú kunngerðina um koyrikort og koyrifrálæru, koyrikortkunngerðina,  so at koyrikortið skal endurnýggjast, tá ið persónur verður 75 ár. Tað sigur Samferðslumálaráðið í tíðindaskrivi.

Endurnýggjanin av koyrikortinum skal gerast við læknaváttan og verður galdandi í 5 ár. Tá ið persónurin verður 80 ár, skal koyrikortið endurnýggjast við læknaváttan 2. hvørt ár.

Løgtingið skal annars í dag viðgera uppskotið frá Kára P. Højgaard, tingmanni úr Sjálvstýrinum, um júst tað sama.

Sum nú er, skal eitt koyrikort endurnýggjast, tá fólk verða 70 ár, og síðani skal tað aftur endurnýggjast, tá fólk verða 74 ár.