Fíggjarlóg: Yvirskotið tódnað

Samgongan væntaði sær 400 milliónir í yvirskoti 2018, men nú árið er farið at halla, vísa nýggjastu metingarnar, at yvirskotið einans verður 276 milliónir ella 125 milliónir minni enn fráboðað. 

Tað er kravda játtanaeftirlitið, sum avdúkar frávikið. 

Høvuðsorsøkin til tódnaða yvirskotið eru lønarhækkingar. 

Lønarhækkingar

Samtykta fíggjarlógin fyri 2018 var ikki íroknað sáttmála-ásettar lønarhækkingar, tí sáttmálasamráðingarnar vóru ikki komnar á mál, tá ið fíggjarlógin varð samtykt. 

Tí var neyðugt við eykajáttan á næstan 70 milliónir til lønarhækkingar longu í apríl. 

Men onnur mál hava eisini etið av ætlaða yvirskotinum. 

Landsstýrið manglar 17 milliónir, sum vóru inntøkuførdar fyri sølu av bygningum, - og umbiðin játtan til eykabát til stranferðsluna kostar 16 milliónir eyka, sum ikki stóru á fíggjarlógini.