Einki fæst at vita um bilar í Føroyum

Tað ber til í Danmark, har heimasíðan nummerplade.net er almenn.

Orsøkin er, at eingin lógarheimild er í Føroyum.

Tað sigur Heðin Mortensen, landsstýrismaður, í svari til Kára P. Højgaard í Sjálvstýri, sum spurdi Aksel V. Johannesen, løgmann, tá hann umsat samferðslumálini í landsstýrinum.

Roynt er tó at fáa lógarheimildina, sum gevur atgongd til akfarsskránna, men tann royndin lukkaðist ikki í løgtingum. 

Í Danmark ber til at fara inn á nummerplade.net og fáa alla kunning um eitt akfar við at upplýsa nummarplátuna ella stellnummarið, sigur Kári P. Højgaard.

Á heimasíðuni sæst millum annað, hvussu nógv skuld er eftir í bilinum, um bilurin hevur verið hýruvognur og um sýn. 

Tá eykalutir verða bílagdir uttanlands, ella keyptir frá øðrum handli enn tí, sum umboðar bilmerkið, er neyðugt at hava hesa vitan fyri at fáa røttu lutirnar, sigur Kári P. Højgaard.