Stríð um Marghøllina endað

Fíggjarmálaráðið bað í síðstu viku Kommunuala eftirlitið í Heilsu- og innlendismálaráðnum um at geva sjey býðráðslimum í Vági dagbøtur fyri at samtykkja fíggjarætlanina fyri 2019 uttan at taka Marghøllina við í roknskapin hjá kommununi.

Kommunala eftirlitið hevur tó ikki givið hesar dagbøtur enn, tí bíðað varð eftir býráðsfundinum í Vági í gjárkvøldið.

Og stríðið millum Vágs kommunu og Fíggjarmálaráðið um Marghøllina í Vági er nú endað, sigur Vágs býráð. 

Á býráðsfundinum í gjárkvøldið samtykti Vágs býráð, at Vágs kommuna skal taka við Marghøllini í Vági. 

Marghøllin, sum Vágs ítróttarráð átti, skal nú roknast sum ein kommunalur stovnur ella sum ein sjálvstøðugur sjálvognarstovnur.

Vágs kommuna yvirtók Páls høll í fjør.

Upp um álíkningina

Tær báðar hallirnar gera, at nettoskuldin hjá Vágs kommunu fer upp um eina álíkning í ár, men skuldin verður væntandi undir eina álíkning í 2020.

Marghøllin ger tó ikki, at Vágs kommuna noyðist at broyta raðfestingar í fíggjarætlanini fyri 2019 og seta pening av til Marghøllina.

Vágs kommuna hevur frammanundan ein leigusáttmála við Marghøllina, sum er ein millión krónur til rakstur og annað.

Fíggjarmálaráðið væntar at fáa eina frágreiðing frá Vágs kommunu um avgerðina í gjárkvøldið. 

Men í ráðnum halda tey nú, at málið er loyst, og dagbøturnar verða ikki skrivaðar út.

Býráðið í Vági hevur tó ikki søkt um loyvi til at skylda meira enn eina álíkning, men enn er ikki greitt, um Fíggjarmálaráðið ger nakað við tað.