Eingin løgtingsfundur ásettur enn

Men tað eru nokk av málum at taka upp til viðgerðar. Aðalorðaskifti um eldrapolitikk verður eitt tað fyrsta, sum verður á dagsskránni hjá løgtinginum, tá tað kemur saman aftur.

 

Annika Olsen, landsstýriskvinna í almannamálum, fer at geva løgtinginum eina frágreiðing um, hvat landsstýrið ætlar á eldraøkinum, og síðani verður aðalorðaskifti um tað.

 

Eitt aðalorðaskifti hevur higartil verið í hesari tingsetuni. Tað var um fiskivinnupolitikkin í framtíðini. Bara trý tingmál, sum vórðu løgdu fram fyri jól, hava onga viðgerð havt enn.

 

Eitt teirra er uppskotið hjá Tjóðveldi og Framsókn um stjórnarskipan Føroya. Tað varð lagt fram 7.september. Men fyrsta viðgerð hevur ikki verið enn. Løgtingsformaðurin sigur, at flokkarnir, sum eiga málið, bóðu um at fáa fyrstu viðgerð útsetta, tá hon skuldi vera tíðliga í heyst.

 

Meirilutin í formansskapinum fer at mæla tinginum til at vísa uppskotinum burtur, tí umsitingin hjá løgtinginum sigur, at uppskotið um stjórnarskipan er brot á stýriskipanarlógina.

 

Nýggjársaftan segði løgmaður við Útvarpið, at hann fer sjálvur at koma við einum uppskoti um føroyska stjórnarskipan. 

 

Ein tingnevnd hevur fund fyrrapartin í januar. Hósdagin fer Mentanarnevndin at viðgera fýra mál. Teirra millum er uppskotið hjá Javnaðarflokkinum og Tjóðveldi um kringvarpsgjaldið.

 

Flokkarnir mæla til, at øll rinda 0,58 prosent av skattskyldugu inntøkuni í kringvarpsgjaldi. 

 

Teir skjóta eisini upp, at lýsingarinntøkurnar hjá Kringvarpinum verða settar í ein miðlagrunn, haðani allir fjølmiðlar kunnu søkja stuðul.