Klaksvíkar sjúkrahús útbyggjast

Nú byggiskráin er liðug, er heildarráðgevingin í sambandi við, at Klaksvíkar sjúkrahús skal umvælast og umbyggjast, boðin út.

Løgtingið samtykti á vári í fjør at brúka 15 milliónir krónur til úmvælingina og útbyggingina í Klaksvík.

Í fíggjarlógaruppskotinum fyri 2014 eru fimm milliónir settar av.

Men átta milliónir, sum eru játtaðar í 2013 og ikki brúktar, verða fluttar til næsta ár.

Landsverk vil hava tilboðini upp á heildarráðgevingina í seinasta lagi 31.oktober.

Í álitinum um framtíðar sjúkrahúsverk í Føroyum, sum kom í 2007, stendur, at Klaksvíkar sjúkrahús krevur munandi ábøtur.

Mett verður, at arbeiðið kann gerast yvir trý fíggjarár.

Tað mesta av virkseminum á sjúkrahúsinum í Klaksvík er í hølum, sum eru frá 1928 og 1960.

Hølisumstøðurnar eru vánaligar, trongar og sera ótíðarhóskandi.

Tí skal játtanin í verklagslógini fyrst og fremst brúkast til at fáa grundleggjandi hølisviðurskiftini á sjúkrahúsinum nútímansgjørd, sigur Landsverk.