Arvastrongurin hjá føroyingum verður longu lisin

"Lotte Hvas er ikki bert atfinningarsom ímóti FarGen verkætlanini. Hon er atfinningarsom ímóti ílegulesingum sum heild. Tað var hon eisini, tá hon var í Føroyum í vár. Og nú tykist hon at vera serliga atfinningarsom ímóti, at FarGen hevur ført fram, at við verkætlanini fylgja eisini arbeiðspláss og nýggj vitan til Føroyar".

Soleiðis sigur Bogi Eliasen, verkætlanarleiðari fyri FarGen verkætlanina í tíðindaskrivi.

Lotte Hvas fanst fríggjadagin at føroysku ætlanini at skráseta arvastreingin hjá øllum føroyingum í blaðnum Kristeligt Dagblad.

Sambært tíðindaskrivinum frá Boga Eliasen, verkætlanarleiðara, er FarGen ikki fyrst at lesa allan arvastreingin hjá føroyingum.

Tað er sambært skrivinum umráðandi at vísa á, at tað longu eru verkætlanir í Føroyum, har arvastrongurin verður lisin. Víst verður m.a. á skizofreni verkætlanina, sum nú verður kalla iPsych verkætlanin. Har er Gunhild Isfeldt, lækni og forkvinna í Vísindasiðsemisnevndini, kliniskur ábyrgdarhavari, og August Wang ein av høvuðsgranskarunum.

Tey hava staðið fyri at lesa allan arvastreingin hjá umleið 100 føroyingum við álvarsomu sálarligu sjúkuni, skizofreni, skrivar Bogi Eliasen.