Nógv mál í tingið mánadagin

Mánadagin koma nógv uppskot í løgtingið, tí 4.november er tann fyrri av seinastu framløgudøgunum í tingsetuni.

Lógir, sum skulu koma í gildi 1.januar næsta ár, skulu vera lagdar fram í seinasta lagi mánadagin.

Seinni seinasti framløgudagur er fyrst í mars.

Tá skal tingið í seinasta lagi hava tey mál, sum skulu avgreiðast í tingsetuni 2013, sum endar á ólavsøku 2014.

Til ber tó at koma við uppskotum í tingið eftir seinasta framløgudag.

Men tá krevst, at minst 17 tinglimir skriva undir, at tað er í lagi, at málið verður lagt fram.

Løgfrøðingarnir hjá løgtinginum hava úr at gera í hesum døgum við at eftirkanna uppskotini, sum skulu leggjast fram mánadagin.

Tað var eisini orsøkin til, at fundurin hjá Landsstýrismálanevndini í gjár varð útsettur í eina viku.

Nevndin skuldi í gjár orða arbeiðssetningin hjá kanningarstjóranum, sum skal kanna Kára P. Højgaard, fyrrverandi landsstýrismann, og Kaj Leo Holm Johannesen, løgmann.