Stríðið móti diabetes tapt

Arbeiðið við at avmarka diabetes virkar ikki.

Tá árið er úti, hava 382 miljónir fólk kring heimin diabetes, og so nógv hava ongantíð fyrr havt sjúkuna, upplýsir altjóða diabetesfelagið, á altjóða degnum fyri diabetes, sum er í dag.

Nógv tey flestu hava typu 2 diabetes, og hon kemur av fiti og ov lítlari rørslu.

Altjóða diabetesfelagið, IDF, upplýsir, at í fjør høvdu 371 milliónir fólk diabetes. Hildið verður, at talið fer at økjast uppí 592 milliónir fólk í 2035.

Støðan versnar hvørt ár

Hvørt ár doyggja 5,1 milliónir fólk av diabetes.

- Støðan versnar hvørt ár, og gongdin er tann sama um allan heimin, sigur David Whiting, serfrøðingur í fólkaheilsu.

Tí mugu polittikararnir taka annað skinn um bak, so fólk fáast at broyta lívsháttin.

Altjóða diabetesfelagið upplýsir, at viðgerðin fyri diabetes nú kostar 3.000 milliardir krónur um árið, og útreiðslurnar økjast hvørt ár.

Tá talan er um diabetes, stendur ringast til í Kina, og í londunum í vestara partinum av Kyrrahavinum. Har hevur triðjahvørt vaksið fólk diabetes.