Bankastjórar í Íslandi dømdir

Teir fýra fyrrverandi Kaupthing-stjórar eru dømdir fongsulsrevsingar í millum trý og hálvtsætta ár. Tað skrivar sandportal.fo.

                                                             Mohammed Bin Khalifa Bin Hamad al Thani 

Nakrar vikur undan bankaskrædlinum í Íslandi boðaði Kaupthing frá, at sjeikurin Mohammed Bin Khalifa Bin Hamad al Thani úr Qatar hevði keypt 5 prosent av bankanum.

Handilin styrkti álitið hjá partabrævamarknaðinum á Kaupthing, men tað, sum bankin ikki upplýsti, var, at handilin varð framdur við einum láni frá Kaupthing sjálvum.

Ein kanningarnevnd, sett av Altinginum, legði upplýsingarnar um lánið fram.

Størsta mál av sínum slag

Tingrætturin í Reykjavik dømdi í gjár fyrrverandi forstjóran í bankanum, Hreiðar Már Sigurðsson, hálvtsætta ára fongsul, meðan fyrrverandi nevndarformaðurin, Sigurður Einarsson, fekk fimm ára fongsul. Magnus Gudmundsson, som var forstjóri í Kaupthing í Luksemburg, fekk trý ára fongsul, meðan Ólafur Ólafsson, sum var næststørsti partaeigarin í bankanum undan skrædlinum, fekk hálvtfjórða ára fongsul.

Hetta er størsta málið, sum higartil er reist í kjalarvørrinum á bankakreppuni í Íslandi. Ákærin, Ólafur Thor Hauksson, førdi 50 vitni í rættinum.