Prísvøksturin steðgaður - prístalið lækkaði í fjør

Prísvøksturin er steðgaður í Føroyum. 

Brúkaraprístalið lækkaði í fjør. Miðalbrúkaraprístalið lækkaði 0,6 prosent í 2013. Árini frammanundan hækkaði prístalið 2,1 prosent í 2012 og 2,3 prosent í 2011, upplýsir Hagstovan.

Rentan og oljuprísurin gera mun

Tað er fyrst og fremst miðalrentan á bústaðarlánum, sum hevur drigið býliskostnaðin niður, miðalrentan er lækkað 7,8 prosent. Og prísurin á brenniolju er lækkaður 3,4 prosent, men elprísurin er tó hækkaður 3,1 prosent.

Prístalið lækkaði eisini í øðrum nýtslubólkum í 2013, mest í samskifti, 2,9 prosent, og eitt nú innbúgv og húsbúnaður eru vorðin bíligari, prístalið lækkaði 1,3 prosent í fjør.

Klæði og skógvar gjørdust dýrari í fjør, 1,3 prosent, og matvøruprísirnir hækkaðu 0,4 prosent.