Egyptaland: Stórur meiriluti fyri grundlógini

Egyptaland skal hava nýggja grundlóg, og sambært egyptiskum miðlum hevur ein stórur meiriluti atkvøtt fyri nýggjum grundlógini.

55 prosent av teimum, sum høvdu valrætt, atkvøddu, og sambært eini keldu í innanríkisráðnum hava meiri enn 90 prosent atkvøtt fyri.

Fólkaatkvøðan endaði í gjár, og úrslitið verður kunngjørt fríggjadagin. Muslimska Brøðralagið mælti fólki frá at fara at atkvøða. Brøðralagið styðjar fyrrverandi forsetan, Mohamed Mursi, sum herurin koyrdi frá í juli. 

Verjuovastin kann stilla upp

Nýggja grundlógin ruddar slóð fyri, at Abdel Fattah al-Sisi, verjuovasti, kann stilla upp til næsta forsetavalið í Egyptalandi. Enn er ikki ásett, nær forsetaval skal vera. Nýggja grundlógin kemur í staðin fyri hana, sum Mursi setti í gildi, eftir at hann varð valdur í 2012. 

Tá Mursi skrivaði út fólkaatkvøðu um sítt grundarlógaruppskot, vóru 33 prosent av teimum 55 veljarunum á vali, og av teimum atkvøddu 64 prosent fyri.