Gammeltoft-Hansen kanna løgmann og Kára P

Danski løgfrøðiprofessarin og doktarin, Hans Gammeltoft-Hansen, er settur sum kanningarstjóri at kanna Kára P. Højgaard og Kaj Leo Holm Johannesen og Eysturoyartunnilin.

Hans Gammeltoft-Hansen, sum fyllir 70 ár um eina góða viku, var Fólkatingsins umboðsmaður frá 1987 til 2012.

Hann er millum annað kendur í Danmark fyri lut sín í Tamilmálinum og Nørrebromálinum um ófriðin á Nørrebro 18.mai í 1993.

Í 1976 gjørdist Hans Gammeltoft-Hansen doktari í løgfrøði, tá hann vardi ritgerð sína um varðhaldsfongsling.

Hann gjørdist professari í rættarvísindum á lærda háskúlanum í Keypmannahavn í 1977.

Løgtingsformaðurin hevur leitað eftir øðrum kanningarstjóra, síðani Anfinn Vitalis Hansen gavst 10.januar, tí ivi var um gegni hansara.

Kanningarstjórin skal kanna og gera frágreiðing til løgtingið, um Kári P. Højgaard, sum var landsstýrismaður í innlendismálum, og Kaj Leo Holm Johannesen, løgmaður, fyrisótu málið um Skálafjarðartunnilin á lógligan hátt.

Landsstýrismálanevndin bað um at fáa kannað sjey viðurskifti, fimm teirra eru um Kára P. Højgaard, og hini bæði um løgmann.

Í gjár kunngjørdi løgtingsformaðurin so, at Hans Gammeltoft-Hansen hevur tikið av at vera kanningarstjóri.