2,6 mió. kr. í koyripengum

Føroyskir politikarar býttu 2,6 milliónir krónur í skattafríum koyripengum millum sín í fjør. 

Landsstýrisfólk fingu mest. Johan Dahl, Karsten Hansen og Bjørn Kalsø fingu 164.195 krónur hvør í fjør, og Jørgen Niclasen fekk 142.778 krónur. Fyrrverandi landsstýrismaðurin Kári P. Højgaard fekk einans 66.431 krónur í kóyripengum í fjør. Men hann var eisini koyrdur. Annika Olsen og Kaj Leo Holm Johannesen máttu klára seg uttan koyripengar. Tey búgva í Havn og hava ikki rætt til koyripengar.

Karsten Hansen, Bjørn Kalsø og Johan Dahl, sum býr í Fámijen, hava longst til arbeiðis og fingu tí mest.

10 ferðir so nógv

Føroyskir politikarar fáa harvið í miðal 10 ferðir so nógv í koyripengum sum vanlig fólk. Teir politikarar, sum fingu mest í 2013, fingu meira enn 20 ferðir so nógv sum vanlig fólk.

Taks flutti fyrr í mánaðinum 1066 føroyingum samanlagt 7 milliónir krónur í koyripengum. Tað er 6.500 krónur í miðal til hvønn.

Tvær skipanir

Tað eru tvær koyripenga-skipanir fyri politikarar. Tað er neviliga soleiðis, at landsstýrisfólk hava eina koyripenga-skipan og løgtingsfólk eina.

Løgtingslimirnir fingu, sambært einum innliti hjá Kringvarpinum, 1,7 milliónir krónur at deila í koyripengum í 2013. 11 tinglimir búgva at síggja til í Havn, Hoyvík, á Hvítanesi ella aðrastaðni í Suðurstreymoy og fáa tí sambært reglunum ikki koyripengar. Tað vil siga at 22 tinglimir deila 1,7 milliónir krónr í koyripengum.

Eingin ætlan er at broyta skipanina hjá teimum fólkavaldu í løgtinginum. Men ein ætlan er at broyta sera lukrativu treytirnar hjá landsstýrisfólkum.