Avtala skal steðga harðskapinum í Kijev

Hóast ukrainski forsetin, Viktor Janukovitj, hevur boðað, at stjórnin og andstøðan hava gjørt avtalu, sum skal steðga harðskapinum í Kijev, er framvegis ógreitt, um nøkur avtala er fingin í lag.

Í nátt vóru samráðingar á forsetaborgini millum Janukovitj og umboð fyri andstøðuna, og tríggir ES-uttanríkisráðharrar, sum eru í Kijev, vóru semingsmenn.

'Andstøðan hevur ongar viðmerkingar til málið, og franski uttanríkisráðharrin, Laurent Fabius, sigur við Reuters, at fyrst skal andstøðan ráðføra seg.

- Í eini støðu sum hesari, tá málið ikki er endað, ræður um at vera varin, sigur Fabius.

Týska uttanríkisráðið sáar eisini iva, um nøkur avtala er gjørd, tí samráðingarnar eru ikki lidnar.

Ukreinskt sjónvarp veit at siga, at avtala er gjørd, og hon ber í sær, at ein skiftisstjórn verður skipað, at val verður útskrivað í næstum, og at broytingar verða gjørdar í grundlógini.