Russiskar herdeildir streyma inn á Krim-hálvoynna

- Neyðugt er við russiskum herdeildum í Ukraina, til politiska støðan aftur er komin í fasta legu, sigur russiski uttanríkisráðharrin, Sergei Lavrov, við AP-tíðindastovuna.

Verja landsmenn

Sergei Lavrov sigur, at orsøkin til streymin av russiskum herdeildum inn á Krim-hálvoynna er at verja fólkið og russiskar landsmenn.

- Tað snýr seg um rættindini at liva, onki annað, sigur russiski uttanríkisráðharrin.

Brynjaði hernaðarakfør

Myndir í hópatali vísa brynjaði hernaðarakfør - tey mest nútímans hjá russiska herinum, koyra í stórum fylgjum á sjálvari Krim-hálvoynni.

- Tey, sum tulka hesa støðuna sum álopskendan ágang, og hótta okkum við tiltøkum og boykottum, eru tey somu sum mæla politiskum stuðlum at víkja frá øllum samráðingum, sigur russiski uttanríkisráðharrin.

Sambært ukrainskum myndugleikum hava ukrainsk hernaðarflogfør forðað russiskum hernaðarflogførum at flúgva inni í ukrainskum loftrúmi.

Kelda: VG/AP