Alivinnan skal gjalda tøkugjald og loyvisskatt

Tað stendur í einum lógaruppskoti úr Fíggjarmálaráðnum, sum er komið í løgtingið.

Har stendur eisini, at uppskot um eykaskatt á fiskivinnnuna kemur saman við fíggjarlógini fyri 2015.

Ein fyrimunur við tøkugjaldinum, sum skal leggjast á alvinnuna, er, at tað elvir ikki til skattahugsan, tí eingir møguleikar eru at minka gjaldið við frádráttum, avskrivingum ella øðrum slíkum møguleikum, sigur Fíggjarmálaráðið. 

Samanlagt minni

Størsti vansin er afturímóti, at gjaldið skal rindast, sama um vinnan hevur yvirskot ella undirskot.

Fíggjarmálaráðið mælir eisini til at broyta skattalógina, so alivinnan fær frádrátt í skattskyldugu inntøkuni fyri tøkugjaldið. Loyvisskatturin, sum skotin er upp, kemur aftur at partafelagsskattinum, sum er 18 prosent.

Samanumtikið fær landið minni frá alivinnuni, tá allar broytingarnar eru komnar í gildi.

Í ár fær landið góðar sjey milliónir minni enn landið hevði fingið við galdandi lóggávu, hevur Fíggjarmálaráðið roknað út.

Næsta ár kosta broytingarnar landinum góðar seks milliónir og kommununum 400.000 kr.