Sáttmálar longdir tvey samdøgur

Arbeiðsgevarar og arbeiðarafeløgini binda frið í dag, 1.mai, men herja á aftur í morgin ári

Føroya arbeiðsgevarafelag leggur stóran dent á samráðingarnar við arbeiðarafeløgini, tí tær leggja grundarlagið fyri aðrar samráðingar

Høgni Djurhuus

01.05.2014 - 07:57

Føroya Arbeiðsgevarafelag og tey fimm arbeiðarafeløgini samdust í gjárkvøldið um at leingja sáttmálarnar til í annaðkvøld á midnátt.

Partarnir hava samráðst uttan steðg síðan mánamorgunin. Men í dag, 1.mai, binda tey frið. Samráðingarnar verða tiknar upp aftur í morgin ári klokkan 10.00.

Samráðingarnar byrjaðu fyrst í apríl, tá feløgini løgdu fram krøv síni.

Føroya Arbeiðsgevarafelag sigur, at sáttmálarnir við arbeiðarafeløgini eru teir fyrstu, sum skulu gerast í nýggja samráðingarumfarinum hjá Arbeiðsgevarafelagnum.

Úrslitið av hesum samráðingum er tí týdningarmikið fyri allar aðrar samráðingar, tí hesar samráðingarnar, sum nú eru, eru grundarlagið fyri hinum.

Partarnir hava longu gjørt avtalu um fráboðan um arbeiðssteðg. Verkfall ella verkbann skal fráboðast í minsta lagi 48 tímar frammanundan.

Verður fráboðað fyri middag, verður roknað til á middegi, og verður fráboðað eftir middag, verður roknað til á midnáttt. Tí vera millum 48 og 60 tímar frá tí, at verkfall ella verkbann er fráboðað, til tað byrjar.