Tryggingar vilja ikki rinda fyri Eik leiðslu

Tryggingarnar hjá ovastu leiðsluni í Eikbanka vilja ikki rinda endurgjald, um teir tapa í sakarmálinum móti Fíggjarligum støðufesti.

Tryggingarfelagið Føroyar og evropeiska deildin hjá amerikanska endurtryggingarfelagnum AIG vilja ikki rinda tað, sum oddamenninir í gamla Eik Banka og Eik Grunninum møguliga verða dømdir at rinda Fíggjarligum støðufesti í endurgjaldi fyri ein part av missinum, sum Fíggjarligt støðufesti hevði av at bjarga Eik í 2010.

Endurgjaldskravið er 150 mió. kr.

Tryggingin sigur, at hon fekk skeivar upplýsingar um støðuna í Eik banka og tryggjaði tí undir skeivum fortreytum. Tí taka tryggingarnar ikki við.

Men tað góðtaka Marner Jacobsen, Bjarni Olsen og Odd Bjellvåg ikki.

Fyri at bróta fyrningarfreistina stevndu teir tryggingunum í 2012.

Nú er spurningurin, um sakarmálið millum Eik menninar og tryggingarnar skal viðgerast fyrst ella, um tað skal bíða eftir endurgjaldsmálinum, ella um bæði málini skulu viðgerast samstundis.

Tryggingarnar vilja bíða fyri at vita, um tær yvirhøvur skulu hava nakað krav um skaðabót.

Tí um sakarmálið um endurgjald endar við, at Eik menninir einki skulu gjalda, hava teir heldur ikki brúk fyri tryggingini.

Men ikki allir, sum hava stevnt tryggingunum, vilja bíða. Tað skulu partarnir so tingast um í Føroya rætti, áðrenn avgerðin um raðfylgjuna verður tikin.