Dátueftirlitið svarar Mentamálaráðnum í morgin

Dátueftirlitið er nú við at vera liðugt við viðgerðina av málinum um, hvørt Mentamálaráðið helt lógina, tá nógv umrødda landsroyndin skuldi haldast herfyri.

Dátueftirlitið hevur eftirlit við, at persónsupplýsingarlógin verður hildin og hevur eisini heimildir til eina og hvørja tíð at koma á eftirlitsvitjan á støðum, har persónsupplýsingar verða viðgjørdar ella goymdar.

Landsroyndin miseydnaðist sum kunnugt, men tá Dátueftirlitið í fjølmiðlunum frætti, at ein servari ella ambætari í Kanada spældi avgerandi leiklut, varð Mentamálaráðið biðið um eina frágreiðing.

Dátueftirlitið setti Mentamálaráðnum spurningar um dátutrygd í sambandi við landsroyndina og vildi vita, um persónsupplýsingar vórðu goymdar á servaranum og viðgjørdar rætt, soleiðis sum lógin um persónsupplýsingar krevur.

Í svari sínum til Dátueftirlitið viðgongur Mentamálaráðið, at embætisfólkini ikki hava verið nóg tilvitað um ásetingarnar í persónsupplýsingarlógini í sambandi við landsroyndirnar, men lovar bót og bata í framtíðini.

Stjórin á Dátueftirlitinum, Eyðhild Skaalum sigur, at hon væntar, at eftirlitið verður liðugt við viðgerðina av málinum í dag ella í morgin, og at Mentamálaráðið tá fær niðurstøðuna.