Fýra skip skráseta makrel

Árligu makrelkanningarnar hjá Føroyum, Íslandi og Noreg eru byrjaðar.

Fýra skip, tvey norsk, eitt íslendskt og eitt føroyskt, kanna, hvussu nógvur makrelur er í norskum sjógvi, íslendskum sjógvi og í føroyskum sjógvi. 

Økið, sum verður kannað, er stórt, 2,5 milliónir ferkilometrar, langt norður í Barentshavið, nakað suður um Føroyar og heilt vestur á Hvarvið. 

Finnur Fríði kannar við Føroyar   

Aftur í ár er nótaskipið Finnur Fríði leigað til at gera føroyska partin av kanningunum saman við Havstovuni.

Finnur Fríði skal kanna, hvussu nógvur makrelur er í føroyskum sjógvi. Fimm fólk hjá Havstovuni eru við Finni Fríða, skrivar reiðaríið, Varðin, á sínari heimasíðu. 

Makrelkanningarnar verða lidnar seinni í juli. 

Úrslitini verða brúkt á stovnsmetingarfundi hjá ICES seinni í summar.

Heldur ikki í ár er ES við í felags makrelkanningunum hjá strandarlondunum.