Ull uttan gull

Fyribils fara IRF og Búnaðarstovan at skipa ullarmóttøkuna, men tað er Árni Brattaberg, stjóri á Sirri, ið hevur tikið stig til loysnina. Sirri skal so bera í bandi, at ullin verður skild, pakkað og vaskað.

Sostatt sleppa bøndur og onnur, ið royta, undan at lata ullina sum rusk. Men tey fáa ikki eitt oyra fyri ullina.

Sigert Patursson er formaður í bóndafelagnum. Hann tímir ikki at lata ull uttan at fáa pening afturfyri. Sigert mælir limum sínum til at brúka ullina til okkurt annað; til dømis til at bjálva drenrør við.

- Kann eg spara pening við at brúka ullina til at drena við, so havi eg jú havt ein veruligan vinning. Tað er betri enn at brúka pening og tíð til at lata ullina fyri einki, sigur hann við útvarpið.

Ullarbingjurnar hjá IRF verða settar upp seinast í hesum mánaðinum, tó í Kollafirði 11. august. Bingjurnar verða standandi einar tríggjar vikur.