Eingi hugskot um minni skatt og størri gjøld

Skatturin av lønini hjá teimum, sum ikki fortjena so nógv, skal niður.

Afturfyri hevur landskassin brúk fyri fleiri pengum frá brúkaragjøldum og øðrum avgjøldum.

Tað segði Kaj Leo Holm Johannesen, løgmaður, við Vikublaðið mánadagin.

Men hvørji gjøld, hann hugsar um, kundi hann ikki siga við blaðið.

Tí landsstýrið hevur í løtuni eingi uppskot um nýggj brúkaragjøld ella hækkað avgjøld, og heldur ikki um skattalætta. 

Og tað fer landsstýrið heldur ikki at hava, tá løgmaður heldur røðu sína í løgtinginum týsdagin, ólavsøkudag. 

Eingi hugskot enn

Jørgen Niclasen, landsstýrismaður í fíggjarmálum, sum umsitur skatt og avgjøld, sigur við Útvarpið, at Fíggjarmálaráðið hevur ikki enn nakað uppskot um skattalækking og nýggj brúkaragjøld ella hækkað avgjøld.

Hugskotsskráin, sum embætisfólk í Fíggjarmálaráðnum nú hava arbeitt við í meira enn eitt ár, er ikki liðug. 

13.juni í fjør segði Jørgen Niclasen, at ein embætismannabólkur var settur at gera uppskot um skatta- og avgjaldspolitikk, sum skuldi leggjast fyri landsstýrið í fjør heyst.

Men hugskotini eru ikki liðug enn.