Ov nógv hjáveiða - hava mist fiskiloyvið

Fýra trolarar, tvey pør, hava mist fiskiloyvið, tí teir høvdu alt ov nógva norðhavssild sum hjáveiðu, tá teir fiskaðu makrel.

Annað parið misti fiskiloyvið í eina viku og hitt í tíggju dagar, upplýsir Vørn.

Vørn vil ikki upplýsa, hvørjir trolararnir eru, ella hvussu nógva norðhavssild, teir høvdu.

Asbjørn Senior flutti fiskin frá trolarunum til lands. Og Vørn kannaði lastina, tá Asbjørn Senior landaði í Kollafirði og á Tvøroyri.

Skip, sum ikki hava loyvi at fiska sild, kunnu í mesta lagi hava tíggju prosent av norðhavssild sum hjáveiðu, tá tey fiska makrel.