Kæra um Johan Dahl gevur nógv arbeiði

Tey trý løgtingsfólkini í Landsstýrismálanevndini fáa úr at gera, nú tey av álvara fara í holt við kæruna um Johan Dahl, landsstýrismann.

Tilfarið í málinum er rúgvismikið. Nevndin bað um og hevur fingið skjøl frá Vinnumálaráðnum og Johan Dahl, Strandfaraskipum landsins og Landsgrannskoðanini.

Allir fýra andstøðuflokkarnir kærdu fyrst í mai Johan Dahl, landsstýrismann, tí løgtingsgrannskoðararnir átalaðu hvassliga landsstýrismannin fyri mátan, hann handfór fíggjarligu viðurskiftini hjá Strandfaraskipum landsins í fjør. 

Landsstýrismálanevndin hevði fund í gjár fyri at leggja arbeiðið til rættis. Nógv skjøl eru í málinum, so tað verður ein løta at avgreiða kæruna.  

Talan er um eitt stórt, drúgvt arbeiði, sigur Sirið Stenberg, forkvinna í Landsstýrismálanevndini.