Aðalorðaskifti um at einskilja landsjørðina

Jacob Vestergaard, landsstýrismaður í landbúnaðarmálum, fer fríggjadagin í næstu viku at leggja fram frágreiðing um einskiljing. Tann frágreiðingin verður grundarlagið undir aðalorðaskiftinum.

Tað elvdi til nakað av rumbli í samgonguni, tá Jacob Vestergaard í fjør segði seg ætla at koma í løgtingið við lógaruppskoti um at einskilja landsjørðina nú í vár.

Bæði løgmaður og annar tingmaður Miðfloksins, Bill Justinussen, søgdu tá, at eingin landsjørð verður seld og einskild í hesari tingsetuni og neyvan heldur í hesum valskeiðinum.

Fekk undirtøku frá landsstýrinum í 2013

Jacob Vestergaard svaraði, at hann í oktober í 2013 fekk undirtøku frá landsstýrinum fyri at arbeiða víðari við málinum um at einskilja, almennu jørðina. Fyrsta stigið í arbeiðinum var at lýsa málið neyvt og ítøkiliga. Og tað gjørdi ein arbeiðsbólkur.

Arbeiðsbólkurin segði millum annað, at einki er til hindurs fyri at einskilja tað mesta av landsjørðini, tá lógarheimildin er fingin til tess.

Jacob Vestergaard, sum er fyri at einskilja, segði eisini í fjør, at fekk hann undirtøku frá landsstýrinum, fór hann at leggja fram lógaruppskot um at einskilja landsjørðina fyri løgtingið á vári 2015.

Lógaruppskotið er tó ikki komið enn, men um eina góða viku fær løgtingið frágreiðing um málið.