Føroyingar tryggja skip í Íslandi

Føroyskir reiðarar eru farnir at tryggja skip síni í Íslandi.

Útlendska ávirkanin á føroyska tryggingarmarknaðin hevur verið nakað avmarkað, síðani marknaðurin bleiv latin upp fyri íslendskum og donskum feløgum 1.september í 2010.

Tó hava ávís vinnuøki, serliga skip, tikið av tilboðnum um at tryggja seg í Íslandi.

Tað skrivar leiðslan í Tryggingarfelagnum Trygd í ársfrágreiðingin fyri 2014.

Trygd fegnast um kappingina frá útlendskum tryggingarfeløgum.

Tveir tryggingarmeklarar

Í løtuni tykjast útlendsku feløgini bara at virka í Føroyum gjøgnum tryggingarmeklarafeløg, og kappingin er eisini økt á hesum øki. 

Í fjør vóru tveir skrásettir tryggingarmeklarar í Føroyum. Í 2013 var bara tann eini.

Lógarbroytingin í 2010 ger eisini, at føroysk tryggingarfeløg kunnu selja tryggingar og tryggingartænastur í Danmark.

Í løtuni hevur Trygd tó ongar ítøkiligar ætlanir um at virka uttanlands í 2015, skrivar leiðslan í ársfrágreiðingini.