Sníktu seg umborð: Ætlaðu at søkja um friðskjól

Tveir ungir dreingir, ið bert eru 14 og 15 ára gamlir, sita í løtuni í varðhaldi umborð á Norrönu, ið er á veg til Føroyar úr Danmark, sigur vakthavandi á politistøðini í Havn.

Teir báðir dreingirnir høvdu sníkt seg umborð á skipið í Danmark, tí teir ætlaðu sær víðari til Íslands, har teir høvdu ætlanir at søkja um friðskjól.

Túrurin hjá teimum báðum dreingjunum steðgar kortini í Føroyum mánamorgunin, tá Norröna kemur á havnina við ferðafólkunum. Dreingirnir sleppa ikki víðari til Íslands.

Verða sendir aftur til Danmarkar

- Okkara uppgáva verður at fáa teir báðar dreingirnar niðan í Mjørkadal, har teir skulu sita til Norröna fer aftur til Danmarkar hóskvøldið, sigur Heri Andreassen, vakthavandi á politistøðini.

Hann sigur, at teir báðir dreingirnir eftir øllum at døma hava sitið í Sandholm leguni, ið er bráðfeingis bústaður hjá flóttafólkum í Danmark, áðrenn teir sníktu seg umborð á skipið.

14 og 15 ára gomlu dreingirnir eru báðir ættaðir úr Marokko, sigur vakthavandi. Manningin á Norrönu sá dreingirnar á vakmyndatólum, ið eru á bildekkinum á skipinum.