USA broytir meining um Assad

Líkt er til, at stríðið móti Islamskum Stati hevur fingið USA at broyta hugsan um sýriska forsetan, Bashar Al-Assad.

Amerikanski uttanríkisráðharrin, John Kerry, sigur í samrøðu við CBS, ar tað kann verða neyðugt hjá USA at samráðast við Assad, og at roynt verður at noyða Assad til samráðingarborðið, til tess at steðga krígnum í Sýria. 

Kerry sigur í samrøðuni, at bæði USA og onnur lond, sum hann ikki nevndi við navni, royna at rudda slóð fyri samráðingum við sýrisku stjórnina.

Eygleiðarar siga, at nú roynt verður at niðurberja Islamskan Stat, er Assad ikki tann óndasti.

Kríggið í Sýria hevur vart í fimm ár. Tað byrjaði við einari friðarligari kravgongu móti Assad, forseta, í mars 2011. Uppreisturin ment seg til vápnað stríð, og burtur úr tí eru sprotnir víðgongdir felagsskapir, eitt nú Islamskur Statur. 

Kríggið hevur kravt fleiri hundrað túsund mannalív, og milliónir eru flýdd.