Færri doyggja hóast fleiri fáa staðfest krabbamein

Alsamt fleiri danir fáa staðfest sjúkuna, krabbamein. Høvuðsorsøkin er, at miðallivialdurin í Danmark er farin upp seinnu árini.

Færri og færri danir doyggja nú av krabbameini, hóast fleiri fáa staðfest sjúkuna, vísa nýggj tøl hjá Kræftens Bekæmpelse, sambært danska blaðnum, Politiken, leygardagin.

Í 2012 fingu 34.812 danir staðfest krabbamein, ið eru 20 prosent fleiri enn um aldarskiftið. Í 2012 doyðu 15.527 danir av krabbameini, ið er ein minking uppá 14 prosent sammett við aldarskiftið.

Samfelagsíløga hevur loyst seg

Høvuðsorsøkin, til at alsamt færri danir doyggja av krabbameini, er milliardaíløgan, ið er gjørd í krabbameinsøkið í Danmark seinastu árini, sigur Kræftens Bekæmpelse.

- Milliardaíløgur og áhaldandi politiskt og læknaligt fokus síðani aldarskiftið, síggjast nú aftur, sigur Hans Storm, læknaligur varastjóri hjá Kræftens Bekæmpelse, sambært Politiken.

Krabbamein verður uppdagað skjótari, viðgerðin er skjótari og betri, heilivágurin er betri og viðgerðin er miðvísari nú í Danmark, sigur Hans Storm hjá Kræftens Bekæmpelse

Málið hjá donsku stjórnini er, at tríggir av fýra sjúklingum skulu yvirlivað sjúkuna í 2025. Til sammetingar kemur annarhvør sjúklingur í Danmark frá sjúkuni við lívinum í dag.