Írland: Samkynd loyvi at giftast

3,2 miliónir írar høvdu atkvøðurætt, men hvussu nógv fólk vóru á vali og hvussu býtið var millum ja og nei atkvøður er ikki komið fram enn. Tó er greiður meiriluti fyri at gera samkyndum rætt at giftast, verður sagt.

Írland er ikki fyrsta land, ið loyvir samkyndum at giftast, men er fyrsta landið, ið hevur hildið fólkaatkvøðu um spurningin. Tað var neyðugt, tí hjúnalagið og hjúnabandsrættindi verða nevnd í írsku grundlógini. Bæði í og uttan fyri Írland verður sagt, at talen er um eina kollvelting, tí til tað er ikki meira enn 22 ár síðani, at gerðir, knýttar at homoseksualiteti, vóru strikaðar úr írsku revsilógini.

Katólska kirkjan mælti írum frá at atkvøða fyri hjúnalagi millum samkynd, og kirkjan hevur havt nógv at siga í írskum politikki, men hevur mist ávirkan so hvørt ein gøla fyri og onnur eftir hevur avdúkað, at nógvir katólskar prestar í áravís og langt aftur í tíðina - kynsliga hava gjørt seg inn á børn í hópatali.

Írland hevur síðani 2010 havt eina lóg um skrásett parlag. Ovastin í írsku katólsku kirkjuni, Eamon Martin, erkabispur, sigur, at kirkjan fer at umhugsa at siga frá sær sivila ella løgfrøðiliga partin av øllum hjúnavígslum. Hendir tað verða allar brúðarvígslur í Írlandi borgarligar eins og nógvastaðni í Evropa, har øll fara á ráðhúsið at giftast, og um tey vilja hava kirkjunnar vælsignilsi, ja, so fara tey í kirkju aftaná.