- Tíðindi, mentan og ítróttur
Grøna orkan má brúkast
Ein føroyskur elmarknaður fer at seta meira ferð á grøna orkuskiftið í Føroyum, og tí hava andstøðuflokkarnir í felag lagt uppskot fyri Løgtingið um at skipa ein slíkan marknað.
At tað kostar fýra ferðir so nógv at framleiða streym úr olju sum úr vindi, sær Helgi Abrahamsen sum ein fyrimun, ið bæði SEV og kundin kunnu gera sær dælt av.
Sambandstingmaðurin sær tað heldur ikki sum ein vansa, at onnur feløg selja SEV streym frá vindorku, sum SEV so skal selja víðari, tí SEV hevur alla tíðina verið partur av hesum arbeiðinum.
Ofta fáa andstøðuuppskot ta lagnu, at samgongan ikki tekur undir við teimum, í landsstýrið arbeiðir við einum líknandi uppskoti, men Helgi Abrahamsen sigur, at tað týdningarmesta er, at føroyski elmarknaðurin kemur, og so hevur tað minni at siga, hvør eigur uppskotið.
Andstøðuuppskotið, sum Helgi Abrahamsen hevur lagt navn til saman við Elsebeth Mercedis Gunnleygsdóttir úr Fólkaflokkinum og Steffan Klein Poulsen úr Miðflokkinum, verður lagt fram á tingfundi mikudagin.
Her kanst tú hoyra samrøðu við Helga Abrahamsen:
