Oljutangaskip motorskaða í Eystursjónum

Eitt stórt oljutangaskip rak fyri vág og vind í Eystursjónum, tá týskir myndugleikar komu fram á tað í týskum sjógvi.

Talan er um skipið Eventin, sum er skrásett í Panama, men har eigaraviðurskiftini eru ógreið. 

Skipið var ikki ført fyri at sigla og tí máttu boð sendast eftir sleipibátum. Og tað er ikki heilt vandaleyst, tí skipið er lastað við 99.000 tonsum av olju. Tað er tí einki sum bendir á, at skipið lekur nakra olju.

BBC skrivar, at helst er talan um eitt skip í sonevnda russiska skuggaflotanum. Eftir at tiltøk vórðu sett í verk móti Russlandi eftir innrásina í Ukraina, hevur Russland flutt sína olju sjóvegis og hevur brúkt gomul tangaskip til endamálið.

Av tí talan er um gomul skip, so lúka tey ikki treytirnar til trygd og dygd. Í Svartahavinum vóru fleiri tangaskip neyðstødd í illveðri herfyri. Tað eina fór av um tvøran og eitt annað rendi á land, og tað hevur havt ógvusliga oljudálking við sær. 

Tað eina skipið var frá 1969, hitt frá 1973.