Sleppa ikki aftur til arbeiðis enn

Nógv er á goymslu hjá virkinum, og tað er ikki so lætt at sleppa av við lættsaltaðan tosk um summarið, sigur Hans Jákup Mikkelsen, nevndarformaður i Sandoy Seafood.

Ætlanin er at fáa nakað út úr goymsluni, áðrenn arbeiðið byrjar aftur í virkinum, kanska síðst í august.

Sandoy Seafood keypir frystan tosk úr Noregi og hevur eisini keypt tosk frá Sjúrðarbergi og Akrabergi. Toskurin verður skorin til flak í Skopun, lættsaltaður og frystur.

Høvdu ymsar byrjunartrupulleikar

Fyrstu tríggjar mánaðirnar vóru ymsir byrjanartrupulleikar, men eftir páskir hevur virkið riggað væl, sigur Hans Jákup Mikkelsen, nevndarformaður.

40 fólk hava arbeitt á Sandoy Seafood í Skopun, og summarfrítíðin hjá teimum varar nakrar vikur afturat.

Marine Harvest og Delta eiga Sandoy Seafood, helvtina í part. Arbeiðið í virkinum í Skopun byrjaði fyrst í árinum.