Kanna um dronur kunnu brúkast til fiskiskap

Møguleikin, at dronur kanska í framtíðini fara at finna fisk, verður nú kannaður, sambært tíðindaskrivi frá Evu Kjer Hansen, ráðharra, sum umsitur millum annað fiskivinnuna í donsku stjórnini.

Danska umhvørvis- og matvørumálaráðið hevur latið 1,7 milliónir krónur til eina kanning, sum skal staðfesta, um til ber at brúka dronur í staðin fyri ekkolodd og sonar.

Ber tað til, kunnu fiskiskip spara nógva olju, tí tey sleppa undan at skula leita eftir fiskinum. Í Danmark er oljan 40 prosent av rakstrarkostnaðinum hjá fiskiskipum.

Tey, sum standa fyri royndini, vóna eisini, at dronur, sum finna fisk, kunnu gera, at fiskur ikki verður tveittur fyri borð, tí dronurnar kunnu neyvt siga, hvussu stórar torvurnar eru.