450.000 í stuðli til leiklistaverkætlanir

Fýra leiklistaverkætlanir fáa í ár 450.000 krónur í stuðli. Peningur verður millum annað latin til listaliga gransking sum fyrireiking til leik

Mentamálaráðið stuðlar í ár fýra verkætlanum við 450.000 krónum. Mariann Hansen (myndin) fær 50.000 krónur til listaliga gransking sum fyrireiking til leik

Sigmar Bláberg

Bjarni Mohr

13.01.2016 - 13:14

Mentamálaráðið stuðlar í ár fýra leiklistaverkætlanum við tilsamans 450.000 krónum. GUT við Mariann Hansen fær 50.000 krónur til listaliga gransking sum fyrireiking til leik.

Teatur Grugg við Súsonnu Tórgarð fær 125.000 krónur til uppseting av finska leikinum Sangir við gráa havsins strendur eftir Pipsa Lonka.

SÍ EISINI Yrkisleiklistin má fáa meiri pening

Marita Dalsgaard fær 75.000 krónur til fyrireiking av griksku tragediuni Medea eftir Euripedes, og Leikarafelag Føroya fær 200.000 krónur til norðurlendska leiklistafestivalin, Dagarnir 2016.

Stuðulin til yrkisleiklist, sum í ár er 450.000 krónur, verður latin á hvørjum ári eftir tilmæli frá Leiklistaráðnum, ið virkar sambært lógini um Tjóðpall Føroya og stuðul til yrkisleiklist við meira.

Inn komu seks umsóknir, sum tilsamans søktu um 1.2 milliónir krónur í stuðli, skrivar Mentamálaráðið á heimasíðuni.