Avlopið hjá Trygd tódnað

Avlopið hjá Trygd í 2015 var 6,5 milliónir krónur, boðar tryggingarfelagið frá í morgun. Hetta er ein afturgongd sammett við 2014, tá avlopið var 12,5 milliónir.

Grundin er, at skaðagjøldini vóru munandi størri í fjør enn árið fyri. Skaðaendurgjøld fyri egna rokning hækkaðu upp í 53,6 milliónir krónur samanborið við 49,2 í 2014.

Fyrra hálvár 2015 var tungt

Serliga fyrra hálvár 2015 var merkt av fleiri størri og miðalstórum eldskaðum, umframt at skaðarnir sum heild hava verið fleiri enn undanfarin ár.

Orsøkin er lutvíst, at Trygd hevur fingið fleiri viðskiftafólk, og at skaðarnir tískil eisini eru fleiri, skrivar felagið í tíðindaskrivi í morgun.

Ársúrslitið hjá Trygd fyri 2015 er tó í samsvari við tær ætlanir, ið vórðu lagdar, sigur felagið. Leiðslan í Trygd heldur úrslitið fyri 2015 er nøktandi.