Landsstýrið ræður fyri játtanini til flóttafólk

Løgtingið skal ikki geva landsstýrinum boð um, hvussu tað brúkar pengarnar, sum løgtingið hevur játtað til flóttafólk.

Uttanlandsnevndin hjá løgtinginum mælir beinleiðis tinginum til at fella uppskotið hjá Miðflokkinum um at Føroyar senda skip í Miðjarðarhavið at bjarga flóttafólkum.

Ein samd Uttanlandsnevnd sigur, at hon hevur fingið at vita frá landsstýrismanninum í uttanríkismálum, at hann arbeiðir ítøkiliga við at greina, hvussu mest fæst burtur úr pengunum, sum løgtingið hevur sett av til flóttafólk.

Landsstýrið hevur eisini samband við danskar myndugleikar, sum umsita málsøkið, og sjálvbodnar felagsskapir í Føroyum.

Uttanlandsnevndin heldur tí ikki, at løgtingið skal gera av, hvussu landsstýrið ítøkiliga brúkar játtanina til flóttafólk.

Landsstýrið veit um uppskotið hjá Miðflokkinum, og hevur tað við í sínum metingum, sigur Uttanlandsnevndin.